ارادۂ داخليه نو 99887
يلدز سراى همايونى باش كتابت دائره‌سي
5894
بوگون جمعه سلاملق رسم عاليسيني متعاقب تشويقيه‌ده كائن سلاحخانهٔ همايونى تشريف معالى رديف حضرت پادشاهى وقوعيله اورادن سراى همايونه عودت بيورديلر ايكن رهگزار شاهانه‌ده بر طرز عجيبده بللرندن باغلى سياه چارشبلره بورونمش ويوزلرينی داخي سياه رنگده وغايت اينجه پچه‌لر ايله اورتمش بعض قادنلر مصادف نظرنظرگاه عالى اولرق بونلر غير مستوره دنيله‌جك حالده آچیق صاچق بولونمه‌لرينه وعادةً مأتم البسه‌سى إكسا ايتمش خريستيان قادنلرنه مشابه اولمه‌لرينه نظراً وهلةً إسلام اولدقلرينده تردد بيورلمشدر محتاج إيراد وإظهار اولمديغى وجهله دولت معظمهٔ إسلاميه أدام الله تعالى إلى يوم القيامه‌نك قيام وبقاسى وتزايد شوكت وإعلاسى هيئت دولتك افرادندن بولنان بالجمله مسلمين ومسلماتك كافهٔ أحوال وأوضاع وحرکاتده شريعت غرايى أحمديه‌نك احكام منيفه ومنجيه‌سينه كمال اهتمام ايله توسل واتباع ايتملرينه منوط ومربوط اولوب عكس حال معاذ الله تعالى گرك افراد امت گرك أساس دولت ايچون مادى ومعنوى موجب مضرت بى نهايت اوله‌جغندن اسلام قادنلرنك جملهٔ أوامر الهيه‌دن بولنان أصول وآداب مرغوبهٔ تستر واحتجابه فوق العاده دقت واعتنا ايتملرى لزوم وارستهٔ بیان واتیان اولرق ايشبو چارشبلر ايسه اسلام قادنلرنجه امر تستره أصلا موافق ومساعد اومهديغى گبي لمقصدك شورايه بورايه گيرمك ايچون بعض مناسبتسز ارككلر طرفندن داخى بر پردهٔ فساد وملعنت اولرق استعمال ايدلمكده اولوب حتى کچنلرده بر اركك بو صورتله چارشبه بورونه‌رك قادن قيافتنده مسلحاً بر خانه‌يه دخول ايله اوده‌كه قادنك اوزرينه بالهجوم سرقت ايلديكى اشيايى پنجره‌دن آرقاداشينه آتارق صاووشمش اولديغيندن ديانةً ومصلحةً دركار اولان مضرت ومحاذير عديدهسينه مبنى بو بابده ايجاب ايدنلره صورت لينه ومناسبه‌ده تفهيمات ووصاياى لازمه ايفا اديلمك صورتيله قادنلرجه چارشب اكتساسينك منعى اسبابنك استحصالى شرفصادر اولان امر وفرمان همايونى جناب پادشاهى اقتضاى عاليسندن بولونمش اومغله او بابده امر وفرمان حضرت ولي الأمركدر.
في 4 رمضان سنه 1309
وفي 20 مارت 1308
[2 نيسان 1892]
سركاتب حضرت شهريارى
بنده ثريا